Azərbaycanda son aylarda bank kartlarından oğurluq hallarının sayı kəskin şəkildə artıb. Vətəndaşlar, sadəcə bir klik və ya qısa telefon zəngi ilə minlərlə manat itirdiklərini bildirirlər. Sosial şəbəkələrdə, xəbər portallarında bu cür şikayətlərə tez-tez rast gəlinir: "Axırıncı dəfə 150 manat çıxdılar, linkə daxil oldum, pulumu oğurladılar", "Uşağın kartından 800 manat yoxa çıxıb", "Pulu evdə saxlamaq daha təhlükəsizdir."
Mütəxəssislər isə xəbərdarlıq edir: rəqəmsal aləmdə fırıldaqçıların üsulları hər keçən gün daha da peşəkarlaşır. İnsanlar azacıq ehtiyatsızlıq nəticəsində kart məlumatlarını ələ verərək pul itkisilə üz-üzə qalırlar.
Təhlükəli linkləri necə tanıyaq? Dominos pizza
İnformasiya texnologiyaları üzrə mütəxəssislər bildirir ki, fırıldaqçıların göndərdiyi keçidlər adətən aşağıdakı xüsusiyyətləri daşıyır:
Qeyri-rəsmi və şübhəli ünvanlar (məsələn: bankabc-login.net, secure-pay.az.biz)
Tanımadığınız nömrələrdən və sosial şəbəkələrdən gələn mesajlardakı linklər
Cihaza zərərli proqram yükləyən “.zip”, “.exe”, “.apk” uzantılı fayllar
Kart məlumatlarının daxil edilməsini tələb edən saxta bank və ya poçt səhifələri
Bu keçidlər çox vaxt “Hesabınız bloklanıb”, “Sizə bağlama var”, “Mükafat qazandınız” kimi cəlbedici başlıqlarla təqdim olunur.
Güvənli linklərə necə əmin olaq?
Ekspertlər güvənli keçidləri ayırd etmək üçün aşağıdakı məqamlara diqqət etməyi tövsiyə edirlər:
Sayt ünvanının https:// ilə başlaması və kilid işarəsinin olması
Rəsmi və tanış domenlərdən istifadə edilməsi (www.kapitalbank.az, www.pashabank.az və s.)
Məlumat almaq üçün linkə klikləmək əvəzinə, rəsmi sayta birbaşa daxil olmaq
Qısa linklərə ehtiyatla yanaşmaq və öncədən onların arxasında hansı saytın olduğunu yoxlamaq
Mütəxəssislər və hüquq-mühafizə orqanları bildirirlər ki, vətəndaşlar ilk növbədə şəxsi və kart məlumatlarını tanımadıqları şəxslərlə paylaşmamalı, SMS, WhatsApp və digər platformalardan göndərilən linklərə klikləməzdən əvvəl ciddi şəkildə düşünməlidirlər. Alış-veriş və digər əməliyyatlar yalnız güvənilən mənbələr və rəsmi saytlar vasitəsilə aparılmalıdır. Əgər hər hansı bir şübhəli hal baş verərsə, dərhal bankla əlaqə saxlamaq və kartı müvəqqəti bloklamaq tövsiyə olunur. Rəqəmsal dövrdə maliyyə təhlükəsizliyi hər bir istifadəçinin şəxsi diqqətindən asılıdır. Fırıldaqçılara qarşı mübarizədə ən güclü silah isə məlumatlı və ayıq-sayıq davranmaqdır.
Aytac Şahin
Telegram kanalımız
