Saatlıda koronavirus pandemiyasının genişlənməsinin qarşısının alınması məqsədi ilə tədbirlər davam etdirilir
DİN Mətbuat Xidmətinin Bərdə regional qrupundan Yenisabah.az-a verilən məlumata görə, elan olunmuş xüsusi karantin rejiminin tələblərinin icrası ilə əlaqədar Saatlı Rayon Polis Şöbəsinin əməkdaşları tərəfindən tədbirlər görülür. Belə ki, Kapital Bankın Saatlı rayon filialında 2000 nəfər üçün nəzərdə tutulmuş pensiya kartlarının dəyişdirilməsi əməliyyatı zamanı sakinlərin həmin əraziyə axınını nəzərə alaraq polis əməkdaşları tərəfindən buraya xüsusi şəkildə nəzarət edilir. Vətəndaşların rahatlığını təmin etmək üçün sosial məsafə gözlənilməklə həmin ərazidə stullar düzülüb, isti hava şəraitini nəzərə alaraq mütəmadi olaraq növbə gözləyən sakinlərə içməli sular verilib, tibbi maskası olmayanlara maskalar paylanılıb. Vətəndaşlar da onlara göstərilən bu diqqət və qayğıya görə polis əməkdaşlarına minnətdarlıqlarını bildiriblər.
Telegram kanalımız
