Kino dünyasında böyük büdcə, ulduz heyəti və ya məşhur bir rejissorun adı çox vaxt uğurun zəmanəti kimi qəbul edilir. Lakin bəzən ən iddialı layihələr belə həm tənqidçilər, həm də izləyicilər qarşısında böyük uğursuzluğa düçar olur. Tamaşaçıların aylarla böyük ümidlərlə gözlədiyi, lakin nəticədə xəyal qırıqlığından başqa bir şey verməyən filmlər siyahısına nəzər saldıqda kino tarixinin ən səs-küylü uğursuzluqlarını görmək mümkündür.
"Yeni Sabah" xəbər verir ki, bu siyahının ən bariz nümunələrindən biri 2019-cu ildə işıq üzü görən "Cats" musiqili filmidir. Brodvayin ən uğurlu əsərlərindən birinin möhtəşəm aktyor heyəti ilə ekrana uyğunlaşdırılması kağız üzərində dahi bir ideya kimi görünürdü. Lakin qeyri-təbii və qorxuducu vizual effektlər, həmçinin hekayənin dağınıqlığı filmi son illərin ən böyük rüsvayçılıqlarından birinə çevirdi. Bənzər bir aqibəti Kin Reuersin baş rolda oynadığı "47 Ronin" filmi də yaşadı. Yapon mədəniyyətinin ən mühüm dastanlarından birini fantastik elementlərlə birləşdirməyə çalışan bu layihə, həm büdcəsini çıxara bilmədi, həm də cansız ssenarisi ilə yaddaşlarda mənfi iz qoydu.
Tarixi və epik janrlarda çəkilən filmlər də bəzən böyük gözləntilərin qurbanı olur. Məsələn, Oliver Stonun iddialı "Alexander" filmi Makedoniyalı İskəndərin həyatını tamamilə fərqli və möhtəşəm şəkildə təqdim etməli idi. Lakin film tempin aşağı olması, xronoloji dağınıqlıq və baş rol ifaçılarının uğursuz aktyorluğu səbəbindən kəskin tənqid olundu. Digər tərəfdən, fantastika janrında Uil Smit və oğlunun rol aldığı "After Earth" filmi də elmi-fantastika həvəskarları üçün tam bir məyusluq oldu. M. Şalmanın rejissorluğu ilə böyük səs gətirəcəyi düşünülən bu film, darıxdırıcı gedişatı və zəif aktyorluq nümayişi ilə yadda qaldı.
Populyar mədəniyyətin və komikslərin adaptasiyaları da bəzən hədəfdən tamamilə yayınır. 2015-ci ildə yenidən çəkilən "Fantastic Four" filmi Marvel dünyasının ən köklü komandalarından birini müasir şəkildə təqdim etməli idi. Lakin çəkiliş meydançasındakı xaos və ssenarinin bərbadlığı ortaya qaranlıq, ruhsuz və heç bir məntiqi əsası olmayan bir nəticə çıxardı. Bənzər şəkildə, DC kainatının ən maraqlı personajlarından olan "Green Lantern" (Ryan Reynolds-un baş rolu ilə) həddindən artıq süni görünən vizual effektləri və bəsit ssenarisi ilə gözləntilərin çox altında qaldı.
Hətta dahi rejissorların və sevilən franşizaların davam filmləri də sığortalanmayıb. Vaxovski bacılarının "Jupiter Ascending" filmi vizual olaraq göz qamaşdırsa da, daxili məntiqdən uzaq ssenarisi və personajların zəif işlənməsi səbəbindən böyük bir uğursuzluğa çevrildi. Eyni aqibəti Disney-in milyardlıq layihəsi olan "John Carter" də yaşadı. Əslində elmi-fantastika janrının atası sayılan bir əsərdən uyğunlaşdırılan bu film, marketinq səhvləri və çox qarışıq hekayə strukturu ucbatından studiyaya yüz milyonlarla dollar ziyan vurdu.
Siyahını tamamlayan son iki nümunə isə klassik hekayələrin uğursuz variantlarıdır. Qay Riçinin fərqli üslubda çəkdiyi "King Arthur: Legend of the Sword" filmi, rejissorun digər işləri kimi dinamik və cəlbedici olmalı idi, lakin həddindən artıq sürətli montaj və qarışıq hekayə tamaşaçını filmdən soyutdu. Nəhayət, klassik canavar filmlərini vahid bir kainatda birləşdirmək istəyən Universal studiyasının Tom Kruz ilə çəkdiyi "The Mummy" (2017) filmi həm aktyorun karyerasında, həm də studiyanın planlarında böyük bir uğursuzluq nöqtəsi oldu. Bu film yeni bir franşizanın başlanğıcı olmalı ikən, maraqsız və klişelərlə dolu quruluşu ilə bütün layihənin vaxtından əvvəl sonlanmasına səbəb oldu.
Nazim Hacıyev
Telegram kanalımız
