Qış və yaz aylarının sevilən meyvələrindən biri olan kivi son illərdə Azərbaycanda da həm istehsal, həm də istehlak baxımından geniş yayılıb. Tünd yaşıl rəngi, turşumtar dadı və içərisindəki kiçik toxumları ilə tanınan bu meyvə həm təravətləndirici təsiri, həm də zəngin vitamin tərkibi ilə seçilir. Həkimlərin və dietoloqların fikrincə, kivi gündəlik qida rasionuna daxil edilməsi vacib olan meyvələrdən biridir.
Yenisabah.az kivinin faydalarını təqdim edir:
Vitamin və minerallarla zəngin meyvə Marqarita pizza
Kivi C vitamini ilə xüsusilə zəngindir. Mütəxəssislərin sözlərinə görə, bir ədəd orta ölçülü kivi insanın gündəlik C vitamini ehtiyacının təxminən 80-100 faizini ödəyə bilər. Bu da immun sisteminin gücləndirilməsində mühüm rol oynayır. C vitamini ilə yanaşı, kivinin tərkibində A, E, K vitaminləri, fol turşusu, kalium, maqnezium, dəmir və lif də var. Bu maddələr bədəni iltihab və infeksiyalardan qorumağa kömək edir.
İmmunitet sistemi üçün təbii dəstək
Xüsusilə dəyişkən hava şəraitində tez-tez rast gəlinən soyuqdəymə, qrip və digər virus infeksiyalarına qarşı bədənin müqavimətini artırmaq üçün kivinin gündəlik istifadəsi tövsiyə olunur. İmmuniteti zəif olan uşaqlar, yaşlılar və tez-tez xəstələnən insanlar üçün bu meyvə təbii qoruyucu vasitə sayılır.
Həzm sisteminə faydaları
Kivinin tərkibində olan təbii liflər bağırsaq fəaliyyətini tənzimləyir və qəbizliyin qarşısını alır. Eyni zamanda bu meyvə “aktinidin” adlı fermentlə zəngindir ki, bu da proteinlərin daha asan həzm olunmasına kömək edir. Yeməklərdən sonra bir kivi yemək həzmi yüngülləşdirə və şişkinliyin qarşısını ala bilər.
Ürək-damar sağlamlığını qoruyur
Kivinin tərkibindəki kalium ürək ritmini stabilləşdirir, qan təzyiqinin normada qalmasına yardım edir. Eyni zamanda bu meyvə qanı durulaşdırır, xolesterin səviyyəsini aşağı salır və damar divarlarını gücləndirir. Bu xüsusiyyətləri ilə kivi infarkt və insult riskini azaltmağa kömək edə bilər.
Dəri və göz sağlamlığına təsiri
Antioksidantlarla zəngin olan kivi dərini sərbəst radikallardan qoruyur, qocalma prosesini ləngidir və dəriyə parıltı verir. Həmçinin A və E vitaminlərinin təsiri ilə dəri hüceyrələrinin yenilənməsi sürətlənir. Kivi göz sağlamlığı üçün də faydalıdır – lutein və zeaksantin kimi maddələr gözləri günəş şüalarının zərərli təsirindən qoruyur.
Yuxusuzluq və stressə qarşı təbii yardımçı
Son tədqiqatlara əsasən, kivinin tərkibində olan antioksidantlar və serotonin maddəsi sinir sisteminə müsbət təsir göstərir. Bu da yuxusuzluqla mübarizədə faydalı ola bilər. Gecə yatmazdan əvvəl bir ədəd kivi yemək daha rahat və dərin yuxuya kömək edə bilər.
Kimlərə kivi yemək olmaz?
Bununla belə, hər məhsulda olduğu kimi, kividə də ehtiyatlı olmaq lazımdır. Bu meyvə bəzi insanlarda allergik reaksiya verə bilər – xüsusilə ağızda yanma, qaşınma, dildə şişkinlik kimi simptomlar yaranarsa, istifadəni dərhal dayandırmaq və həkimə müraciət etmək lazımdır. Həmçinin, mədə turşuluğu yüksək olan şəxslər kividən istifadə edərkən diqqətli olmalıdırlar.
Nazim Hacıyev
Telegram kanalımız
