"Demək, 46 dövlətin səfiri Şuşaya gedib, oradakı reallığı öz gözləriylə görməyə dəvət olunurlar, hamısı gedir, ABŞ, Fransa, və bir də Rusiyanınkı getmir. Bəlkə, ora atdırılan İsgəndər-M raketinin qalıqlarının partlamasından qorxublar, o üzdən dəvətdən imtina ediblər? Ciddi deməli olsaq, getməmələrinin səbəbi aydındır. Bununla bir daha göstərirlər ki, Minsk qrupunun hər üç həmsədri Azərbaycanın işğal altındakı torpaqlarını azad etməsini istəməyib".
Yenisabah.az xəbər verir ki, bunu deputat Sahib Alıyev deyib.
Deputat qeyd edib ki, bu ölkələrdən ikisi qarşıdurmaya beynəlxalq normalara uyğun deyil, hayların maraqları çərçivəsində son qoyulmasını arzulayıb, biri isə münaqişənin necə var qalmasının, onun həllindənsə idarə edilməsinin tərəfdarı olub. pizza
"Azərbaycan məhz bu üçlüyün istəyinə və marağına rəğmən öz torpaqlarını geri qaytarmağı bacarıb. Bu reallıq, geosiyasi alət kimi faydalananlarının kimlikləri, yerləri və durumları özəllliklə də Şuşadan o qədər qabarıq nəzərə çarpır ki, hər üç ölkənin səfirini başa düşmək çətin deyil", - deyə Sahib Alıyev qeyd edib.
Deputat Fazil Mustafa isə bildirib ki, burada əsas diqqəti çəkən məqam bir-biri ilə guya aralarında ziddiyyət olan üç ölkənin ermənilərlə bağlı məsələlərdə həmişə həmrəy davranmasıdır:
"Bunu müxtəlif cür yozmaq imkanımız var, lakin burada əsas diqqəti çəkən məqam bir-biri ilə guya aralarında ziddiyyət olan üç ölkənin ermənilərlə bağlı məsələlərdə həmişə həmrəy davranmasıdır. Çünki bundan öncə bu səfirlər dağıdılmış Ağdam, Füzuli və başqa ərazilərə də ölkəmizdəki akkreditasiya olunmuş digər diplomatik korpus təmsilçiləri ilə birlikdə baş çəkməkdən imtina etmişdilər. Yəni illərdir erməni vəhşiliyinə açıq və dolayı yolla haqq qazandıran ölkələrinin beynəlxalq hüquqa zidd mövqeyini bir daha nümayiş etdirdiklərini diqqətə çatdırmışdılar. İndi isə bölgədə sülhdən, mədəni quruculuqdan söhbət getdiyi durumda Şuşanın timsalında bir mədəniyyət mərkəzinin dirçəlişini müşahidə etməyi özləri üçün arzuolunmaz bir addım saydıqlarını büruzə verirlər. İşdir əgər ölkə Prezidenti səfirlərin etimadnaməsini dövlət protokolu qaydasında məhz Şuşada qəbul etməyi planlaşdırsa, o zaman bu səfirlər nə edəcəklər? Gedib Xankəndidə terrorçu ermənilərlə şampan şərabı içəcəklər və Şuşaya ayaq basmayacaqlar? Səfirlərin bu addımı təkcə öz ərazi bütövlüyünü bərpa etmiş bir dövlətə hörmətsizlik deyil, həm də gələcəkdə bölgədə müharibənin qızışmasına, erməni terrorçuluğunun canlanmasına verilən bir dəstəkdir".
O əlavə edib ki, Şuşaya adicə bir səfərə getməyi özünə rəva bilməyən bu ölkələrin səfirliklərinin təşkil etdiyi hansısa mədəni xarakterli tədbirlərdə istər Azərbaycan siyasətçiləri, istər də vətəndaş cəmiyyəti institutlarının təmsilçiləri iştirakdan imtina etməlidirlər:
"Hörmət qarşılıqlı olmalıdır, sən mənim Vətənimin, dövlətimin dəyərlərinə hörmətsiz yanaşacaqsan, biz də sizlərin yan-yörənizdə demokratiya nəzakətinə boğulub üzünüzə gülümsəyəcəyik? Fikrimcə, rəsmi Bakı həmin ölkələrin səfirlərinin bu hərəkətsizliyi ilə bağlı izahat tələb etməlidir, bu izahat qaneedici olmadıqda ATƏT-in Minsk qurupu ilə hər hansı müzakirəyə və münasibətə son qoyulmalıdır".
Telegram kanalımız
