"Moskvada baş vermiş dəhşətli silahlı hücumla bağlı Rusiyanın Xarici İşlər Nazirliyi müvafiq qiymətləndirmələr aparıb. Onların mövqeyinə görə, bu, terror aktıdır. Əgər belədirsə, avtomatik olaraq hadisənin siyasi motivli olması üzə çıxır. Çünki terror aktında əsas motiv məhz siyasidir. Beynəlxalq terrorizmə qarşı mübarizə ilə bağlı konvensiyalarda da əksini tapmış müddəaya əsasən, beynəlxalq terror aktında eyni vaxtda dörd tərəf iştirak edir - təşkilatçılar, icraçılar, terror qurbanları və sağ qalmış insanlar. Terror cinayətinin digər cinayətlərdən fərqi bundadır ki, birincinin və ikincinin birbaşa əsas hədəfi heç də öldürdükləri insanlar deyil, sağ qalmışlar olur. Yəni siyasi motiv də bundan irəli gəlir. Mesaj sağ qalmışlara verilir, hakimiyyətə mesajlar ötürülmüş olur".
Bu sözləri Pravda.az-a açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin üzvü Elman Nəsirov deyib.
Deputat bildirib ki, Rusiyanın müvafiq dövlət qurumları baş vermiş cinayət hadisəsinə terror aktı kimi qiymət verirlərsə, deməli, burada Rusiya dövlətinə və onun ali siyasi rəhbərliyinə çox ciddi mesajlardan söhbət gedir: "Tələm-tələsik qiymət vermək çətindir. Bunun üçün Rusiyanın hüquq-mühafizə orqanlarının, dövlət təhlükəsizliyi qurumlarının dəqiqləşdirilmiş məlumatına ehtiyac var. Mətbuatda yayılmış məlumatlara görə, ABŞ-nin terror aktından öncədən xəbəri olub. Bu məlumatlar təsdiqini taparsa, onda çox suallar yaranacaq. Məsələ budur ki, artıq Ağ Ev Kremlə başsağlığı verib. Amma bunlar hələ ilkin məlumatlardır. Doğrudanmı ABŞ-nin bu hadisədən xəbəri olub? Bu sualların dəqiq cavabı yoxdur, sadəcə, mediada yayılmış məlumatdır". Dördpendirli pizza
E.Nəsirov Moskvada törədilən terror aktının Azərbaycana təsirlərindən də danışıb: "Rusiya bizimlə qonşu dövlətdir. Heç şübhəsiz, bu hadisə bir daha beynəlxalq terror təhdidini ön plana keçirir. Nəzərə alsaq ki, Azərbaycan da Ermənistan dövlətinin terrorizm siyasətinin qurbanı olmuş dövlətdir. Ermənistan dövləti Azərbaycana qarşı dəfələrlə terror aktları həyata keçirib, Azərbaycana qarşı müharibənin gedişatında da terror elementlərindən geniş şəkildə istifadə edib. Buna görə də bizim üçün terror hadisəsi yeni hadisə deyil. Müvafiq dövlət qurumlarımız hər zaman bu asimmetrik təhlükə və təhdidlərə qarşı hazırlıqlı vəziyyətdə olmalıdır. Yəqin ki, bu, belədir. Çünki Azərbaycanın Dövlət Təhlükəsizliyi Xidməti, hüquq-mühafizə orqanları ən yüksək peşəkarlıq səviyyəsinə malikdirlər. Təbii ki, dövlətimiz prosesləri diqqətlə izləyir, bundan irəli gələrək müvafiq təhlükəsizlik tədbirlərini daha da gücləndirir".
Telegram kanalımız
